- اول مرة عملت فيها قهوة كنت بكلمها فى التليفون ,فاكر ساعتها القهوة كان طعمها وحش جداً , بس بعد ما سيبنا بعض بقيت اعرف اعمل قهوة كويس
- ادمنت القهوة فى ثانوية عامة كان فنجان القهوة صاحبى الى بيسمعنى وانا بذاكر وميزهقش من دندنتى وانا بحفظ
- شربتها فى نص قهاوى مصر مع اصحابى بس ساعتها كنت بشربها زيادة وكنت بحسها مرة , لكن لما مبقاليش اصحاب بقيت اشربها مظبوط وماحسهاش مرة , بس لازم تكون ب وش
- شربتها ساعة ما اشرف مات بس ساعتها كانت سادة ومرارتها فى حلقى لغايت انهاردة , مش عارف ليه بيقدموا قهوة سادة فى العزاء
- شربتها سخنة وساقعة وبلبن وسادة ومغلية وامريكانى شربتها بكل اشكالها
- ساعات كانت بتبقى من غير وش , وساعات بيبقى ليها وش بس بهتان , وساعات الاقى وشها بيضحكلى وساعات الاقيه غامق ومكشر ودايماً دايماً ببص فيها اشوف وشى
- لما اتجوز . لازم تكون بتعرف تعمل قهوة بس تكون قهوة وشها بيضحك
فادى فتحى
27.5.2011
