لما كنت صغير وكان بيقبى المفروض انام ومكنتش بعرف بسبب خوفى من الضلمة - لا دلوقتى مبخفش من الضلمة - او انى مش جيلى نوم كنت بحب اسلى نفسى عالسرير لغايت ما يغمى عليا وانام اجبارى من غير ما اعرف .
كنت اتخيل وانا نايم عالسرير انى عندى القدرة انى اغمض عينى واطير _ معرفش ازاى - لمكان تانى حاجة كدة زى السحر , اغمض عينى مثلاً وابقى على بعد 230 كيلو من السرير فى بلد تانى مع ناس كنت بحبهم , واتخيل انى قاعد معاهم شايفهم وسامعهم , وشايفنى
كنت مثلا اتخيل انى فى بلد عالبحر وقاعد على الكورنيش او على الرمل جنب البحر , او مثلا اتخيل انى سواق قطر سكة حديد - ودى كانت امنيتى عشان كدة دخلت طب - ومسافر بليل , او اتخيل انى قضيت اليلة دى فى امريكا عند خالو الى مكنتش شفته من كام سنه , واليله دى عند تيته , وليله عند ابن الجيران - الى ماما مكنتش بتخلينى اطلع عندهم كتير - وليله وليله وليله , لدرجة انى مش فاكر الاماكن الى زرتها من كتر الليالى الى سافرت فيها , والى قضيتها على سريرى الطائر .
يمكن زمان كنت بضحك على عقلى وافهمة انى مع ناس بحبهم , او فى اماكن بعشقها , او بعمل حاجة بحبها -كانى مثلاً قبطان طيارة او عميل مخابرات سرى- كان بيصدق وكنت بنام مبسوط وعلى وشى سعادة نفسى فيها تانى , لانى عملت الى بحبه واتحررت من كل القيود , قيود اللحاف والكوفرته الى فوقيه او البطانيه الى تحته , قيود الحيطان الخرسان , او قيود المكان والزمن
لكن دلوقتى لما كبرت - زى ما بيقولوا - وعلقى كبر - بردة زى ما بيقولوا - بقيت مش عارف اضحك عليه , وبقى مش بيصدق الموضوع دة رغم انى لسه بحاول , بس بردة مش بنام مبسوط زى زمان , بنام وانا حاسس انى اهبل- معرفش لية ؟ -
يمكن كبرت لكن حصان خيالى الى كنت بركبه واسافر بيه بعيد عن السرير بكتير لسه بصحته , ولسة صغير ولسه بسمع كل يوم صهيله فى اسطبل سريرى وكأنه بيطلب يخرج
يمكن عقلى كبر لكن القلب لسه قلب عيل فى ابتدائى - بس هوا دة ممكن ؟-0
فى ناس كتير بنحبها ,اماكن كتير بيدق قلبنا فيها , حاجات كتير بنحب نعملها , لكن الحياة بتبعدنا عن الناس دى , وعن الامكان وبتمنعنا نعمل الى بنحبه وبسيعدنا , بقيودها تحت اسامى العقل والرزانه والكبر والقدر وكلام كبير
بتخلينا الحياة نكبر ونيشيخ وتخلينا ننسى حصان خيالنا , او نستهبله ونستعيله , لغايت ما يكسل ويموت من قله الحركة , وكل مرة بحاول اشطح بحصان خيالى ومبقدرش , او بحس بالطفولة البلهاء بتمنى فعلا ً انى اكون بقدر اغمض عينى واسافر اى مكان فى الدنيا
ليست هناك تعليقات:
إرسال تعليق